შარახევი საფრთხის ქვეშ

2011.07.05  |  23:52 თეა თოფურია გიორგი კუპატაძე
შარახევი საფრთხის ქვეშ

თიანეთის რაიონის სოფელ შარახევში, ცოტა ხნის წინ, სტიქიამ სოფლის გზა მთლიანად წაიღო. ახლა ამ ადგილას მანქანით გავლა შეუძლებელია. დაზარალდა რამდენიმე ოჯახი, მათ სახლები დაენგრათ. თუმცა, მთავრობას ეს ზიანი არ აუნაზღაურებია.

შარახევი მთის სოფელია და სხვა დასახლებული პუნქტებიდან საკმაოდ შორს მდებარეობს. სოფელში ძირითადად ასაკოვანი ხალხია დარჩენილი.

 

მართა მგელიაშვილი 84 წლისაა. შვილთან ერთად ცხოვრობს. ვაუჩერი და დახმარება რა არის, არც იცის. შუქი კი გვაქვსო, - გვიპასუხა. ამ ოჯახის სარჩო ძროხებია. ბოსტნის მცირე ნაკვეთზე ბევრი არაფერი მოდის. მთაშიც ვერაფერს იშოვი. „მთაში რას გავალ, აივანზე ძლივს გამოვდივარ“, - ამბობს მოხუცი.

 

მართა მგელიაშვილი, ადგილობრივი: „კიდევ კარგი დღე მოხდა. დავწიოკდით. ხალხი მოგვეშველა. მცოდნოდა წინასწარ, ასე მოხდეოდა, აქ რა გამაჩერებდა. შიგ შემოვარდა წყალი, ჩემმა გოგომ წმინდა მერე. ახლა კიდევ მოხდებაო, ამბობენ. საქონელი არ ჩაუტანია, გადარჩა. მთავრობაც იყო, დაგეხმარებით, როგორ არაო. იმის მერე ჩამი-ჩუმი არ ისმის“.

 

სოფელში სამ ოჯახს სახლი მთლიანად დაენგრა. სხვების შემთხვევაში ან ნაკვეთები დაზიანდა და მოსავალი ვეღარ მიღეს, ან დამხმარე ნაგებობები დაინგრა.

 

ლელა ლიქოკელი, ადგილობრივი: „საღამოხანი იყო ნელ-ნელა წამოვიდა მიწა. ხმა ისმოდა, ხეები ტყდებოდა. ავედით, ვნახეთ. მაშველებიც მოვიდნენ, მაგრამ მეწყერს ვინ გააჩერებდა. ერთი თვე მოდიოდა და ხეები მოჰქონდა. გზაზე ვერც გადავდიოდით და ვერც გადმოვდიოდით. დაგეხმარებითო, მაგრამ არაფერი. მარტო მეწყერის ჩამოტანილი შეშა მოგვიტანეს. გივი ამირხანაშვილი იყო გუბერნიიდან და რაიონის ხელმძღვანელობა. ნაკვეთი დაგვეტბორა. საქონელიღა დაგვრჩა. შეიძლება კიდევ წამოვიდეს. თან აქ არც სკოლა გვაქვს, არც მაღაზია, ცუდად რომ გახდება ვინმე, ან თიანეთიდან უნდა მოვიდეს სასწრაფო, ან დუშეთიდან. ერთ კაცს კი აქვს სოფელში მანქანა. გვეხმარება ხოლმე, თუ გაფუჭებული არაა“.

 

დავით შავედაშვილი, ადგილობრივი: „ბოსელი და საღორე დამენგრა. თიანეთის გამგებელი გოგა აბაიშვილი დაგვპირდა დახმარებას, მაგრამ არაფერი მიგვიღია. გუბერნატორის პირველი მოადგილე გივი ამირხანაშვილიც ამბობდა, თანხა გვაქვს მოთხოვილი 120 ათასი ლარი და ველოდებითო, მაგრამ არაფერი“.

სტიიქიის შედეგად სოფლის მდინარემ კალაპოტი შეიცვალა. მოსახლეობა მდინარის კალაპოტში დაბრუნებასა და დანგრეული სახლების აშენებას ითხოვს.

მცხეთა - მთიანეთის გუბერნატორის ცეზარ ჩოჩელის თქმით, ამ სოფლიდან მოსახლეობა მთლიანად გასაყვანია, რადგან ადგილზე არ არსებობს უსაფრთხო ტერიტორია, რომელზეც სახლს ააშენებ.

 

ცეზარ ჩოჩელი: „იქ მეწყერი ისევ ჩამოწვება, სულ 5-6 მოსახლეა და უნდა გავიყვანოთ. ადრე დუშეთის რაიონში შევთავაზეთ გასახლება, მაგრამ არ დაგვთახმდნენ. ისევ შარახევში გამოგვიყავით ადგილიო, მანდ სახლის აშენებას კი აზრი არა აქვს. მეწყერი ისევ გაანადგურებს. ფულადი კომპენსაციაც რომ მივცეთ, თუ არ გავასახლეთ, არც ამას ექნება აზრი. მაგით პრობლემა ვერ მოგვარდება“.

 

რაც შეეხება მდინარის კალაპოტში დაბრუნებას, ცეზარ ჩოჩელის თქმით, ამ სამუშაოს შესრულებას რეგიონის ხელმძღვანელობა არ გეგმავს, რადგან მეწყერის გამო შეუძლებლად მიაჩნია, მდინარემ ადრინდელი კალაპოტი დაიბრუნოს. კონკრეტულად როდის დაიწყება მოსახლეობასთან უფრო აქტიური მოლაპარაკების ეტაპი, ჯერ უცნობია.